ቢሮው በቅርቡ የተላለፉት 35 ሺህ ቤቶች ከፍተኛ የዋጋ ጭማሪ ተድርጎባቸዋል መባሉ መሰረተ ቢስ መሆኑን ገለፀ

አዲስ አበባ በቅርቡ የተላለፉት 35 ሺህ የጋራ መኖሪያ ቤቶች ላይ በተለያዩ መንገዶች ከፍተኛ የዋጋ ጭማሪ ተድርጎባቸዋል መባሉ መሰረተ ቢስ ነው አለ የአዲስ አበባ የከተማ ኮንስትራክሽንና ቤቶች ልማት ቢሮ።
አስተዳደሩ የቤቶቹ ዋጋ ዝቅተኛ እንዲሆን ለማድረግ ከአጠቃላይ ወጪው 43 በመቶውን መደጎሙንም ነው ዛሬ በሰጠው መግለጫ ያሳወቀው።
በመግለጫው ላይ እንደተጠቆመው መንግስት ለተጠቃሚ የሚተላለፉ የጋራ መኖሪያ ቤቶች ከመሬት ዝግጅት አንስቶ እስኪተላለፉ ድረስ ከፍተኛ የሆነ ድጎማ ተደርጎባቸዋል።
በቤት ግንባታ ወቅት ከፍተኛ ወጪ የሚሆነው የመሬት ይዞታ እንደመሆኑ ከ50 እስከ 60 በመቶ የሚሆነውን አጠቃላይ የቤት ወጪ መንግስት ለማስቀረት መቻሉም ነው የተገለፀው።
በቤቶቹ ላይ እንደየደረጃቸው ድጎማ የተደረገ ሲሆን፥ ለአብነትም በ10ኛው ዙር ለተላለፉ የስቱዲዮ ቤቶች እስከ 35 በመቶ ፣ እንዲሁም ለባለአንድ  እና ሁለት መኝታ ቤቶችም በቅደም ተከተል የ25 እና 10 በመቶ ድጎማ መደረጉን አመልክቷል ።
በመሆኑም አሁን ላይ በተለያየ የመገናኛ ዘዴዎች በአዲስ አበባ በቅርቡ የተላለፉ 35 ሺህ የጋራ መኖሪያ ቤቶች ላይ ከፍተኛ ጭማሪ ነው የተደረገው የሚለው መረጃ ከእውነት የራቀ መሆኑን እና ቤቶቹ በከፍተኛ የመንግስት ድጎማ ለተጠቃሚ መተላለፋቸው ነው የተጠቀሰው።
በበላይ ተስፋዬ
source :FBC